Рускиот претседател, Владимир Путин, денеска во своето телевизиско обраќање до руските граѓани порача дека пензиските реформи во земјата се неопходни, но и дека не се согласува со сите предлози на нацрт-законот за реформа на пензискиот систем.
Путин во своето обраќање, меѓу другото, предложи ново зголемување на старосната граница за пензионирање – за жените до 60 години и за мажите до 65 години.
„Демографскиот развој и трендовите на пазарот на трудот, како и анализата на ситуацијата, покажуваат дека повеќе не можеме да ја одложуваме реформата, но нашата одлука мора да биде праведна, балансирана и да ги почитува интересите на граѓаните“, рече Путин во своето обраќање пред нацијата.
Оригиналните предлози кои предвидуваа зголемување на старосната граница за пензионирање на 65 години од 60 за мажи и на 63 години од 55 за жени, популарноста на Путин ја доведоа на најниско ниво, a предизвикаа и низа протести.