Венецуела воведе нова валута суверен боливар за да ја спаси својата економија, но илјадници трговски центри, супермаркети и пекарници се затворени, пишува Си-ен-ен.
Овој екстремен потег од страна на Владата е последица на предупредувањата на ММФ дека инфлацијата до крајот на оваа година би можела да достигне дури еден милион отсто, како и фактот дека стотици илјади Венецуелци бегаат од земјата поради недостиг на храна и лекови и сè поголем степен на криминал.
Сега на пазарот се користат и старата и новата валута, што дополнително ги збунува трговците и граѓаните. Дури и црниот пазар е замрзнат, бидејќи луѓето веќе не знаат со која валута да тргуваат, со долари, стари боливари или, пак, со новите суверени.
„Овој потег беше премногу нагол и збунувачки, бидејќи Владата не се координира со другите сектори пред да одлучи да се промени валутата„ – изјави политичкиот аналитичар Феликс Сеијас.
Освен девалвацијата на валутата, владата најави и други економски промени, како што се зголемување на минималната плата за 3 000 отсто, раст на ДДВ-то и намалување на моментално високите даноци на гориво.
