Повеќе точки поврзани со референдумот се на дневен ред на четвртата седница што ќе ја одржи денеска Државната изборна комисија (ДИК).
Членовите на ДИК ќе ги разгледаат предлог-одлуките за измена на Годишниот план за вкупните потреби за јавни набавки во 2018 година на ДИК за референдумот, доделување авансни средства на Подрачните одделенија и канцеларии на ДИК за обиколка и обезбедување на избирачките места, како и за доделување на средства за тековни трошоци и транспортни трошоци на општинските изборни комисии. ДИК ќе ги разгледа информациите и за текот на пријавувањето на граѓаните за гласање во странство.
На дневниот ред ќе бидат и барањата за неприфаќање на извршување на должност претседател, заменик претседател, член и заменик член на општинските изборни комисии со Укажување за постапување на општинските изборни комисии, а ќе изврши случаен избор за испразнетите места во ОИК.
Согласно најавите, членовите на Комисијата ќе одлучуваат по барањето за добивање на овластување за набљудување на Референдумот 2018 за Граѓанската асоцијација МОСТ и за Меѓународната фондација за изборни системи ИФЕС – Канцеларија во Македонија.