Ни воздухот веќе не е бесплатен – Русите ги очекува плаќање еколошки данок

Министерството за финансии на Руската Федерација предлага воведување еколошки данок со цел да се замени сегашниот надоместок за негативното влијание врз животната средина. Предложени се даночни стапки што се утврдени според типот на загадувачи, според материјал и отпад.

Целта на даночењето се оправдува со загрижувачките резултати од загадувањето на воздухот, како и формирањето, складирањето и акумулацијата на создадениот отпад, јавува руска „Газета“.

„Даночните обврзници се предмет на регистрација за данок за животна средина на локации и објекти што негативно влијаат врз животната средина, а исплатата се врши во рок од 30 дена од денот на регистрацијата во согласност со законодавството на Руската Федерација во областа на заштитата на животната средина“, се наведува во соопштението.

Данокот исто така ќе се наплаќа и во случај на создавање поголеми количини ѓубре.

Еколошките даночни иновации би требало да станат дел од општите промени. Претходно, владата вети дека ќе ги реформира сите неданочни плаќања. Треба да се креира посебен регистар на такви такси, а некои од нив се пренесуваат во даноци и се вклучуваат во даночниот законик.

Во мај годинава рускиот премиер Дмитриј Медведев им даде инструкции на Министерството за финансии и Министерството за економски развој до 1 септември да се произнесат по прашањето на неданочни плаќања и да го балансираат приватниот и јавниот интерес.