Рускиот нафтен гигант „Роснефт“ добивал по 5,07 милиони барели дневно нафта во првата половина од оваа година. Ова претставува намалување од 0,7 отсто, според податоците на компанијата.
Намалувањето се должи на обврските на Русија за намалување на производството на нафта со други земји од Организацијата на земјите за извоз на нафта (ОПЕК).
Во извештајот за активноста во првите месеци од 2018-та година, компанијата соопшти дека се подготвува за развој на нови нафтени полиња.
Во однос на производството на природен гас во вториот квартал на 2018-та година компанијата го намалува производството за 2,4% во однос на првото тримесечје до 16,46 милијарди кубни метри. Причината за овој пад е планираните поправки и сезонските фактори, се вели во извештајот.
За првата половина од годината, производството на гас изнесувало 33,3 милијарди кубни метри, што е за 2,5% помало од истиот период во 2017-та година.
Компанијата, исто така, објави успешна работа за реализација на полето „Зохр“ во близина на Египет. Производството започна кон крајот на 2017-та година и веќе се воведени во употреба шест сондажи, преку кои дневната екстракција на гас достигнува до 31,5 милиони кубни метри. Уделот на „Роснефт“ е добивка од околу 5,9 милиони кубни метри.
„Роснефт“, исто така, снабдува нафта и природен гас, но „Газпром“ има монопол врз извозот на руски гас. Со текот на годините, компанијата се обидува да ја промени оваа ситуација, вклучително и преку соработка со „Газпром“ на пазарите каде што гасниот гигант нема сериозно присуство.
„Роснефт“ исто така ќе ги објави своите финансиски извештаи за првата половина на 7-ми август.
