Иранската валута ријал падна на рекордно ниско ниво во однос на доларот пред повторното воведување на американските санкции против Техеран.
Многумина стравуваат од долготрајна економска криза и можни немири во земјата.
Поради падот на иранската валута во јуни веќе избувнаа тридневни демонстрации во кои граѓаните се судрија со полицијата пред иранскиот парламент, а загриженоста расте поради најавените американски санкции на 6 август.
Иранската централна банка соопшти дека за остар пад на вредноста на ријалот се виновни „заговорите на непријателот”.
Администрацијата на американскиот претседател Доналд Трамп објави продолжување на санкциите против Техеран во мај, кога САД се повлекоа од меѓународниот нуклеарен договор на шесте големи сили со Иран.
САД, Русија, Кина, Велика Британија, Франција и Германија во 2015 година постигнаа историски договор со Иран, кој се согласи да ја ограничи својата нуклеарна програма, а за возврат му беа укинати санкциите.