Во Општина Куманово во 11 часот ќе се одржи промоција на Младинска повелба за мир (Peace Charter), документ кој обезбедува препораки за надминување на меѓуетничките конфликти и зајакнување на соработката и дијалогот помеѓу заедниците.
Повелбата за мир ги содржи ставовите и барањата на стотина младинци од различна етничка припадност од општините Куманово, Крива Паланка, Старо Нагоричане, Липково и Кратово, кои преку низа настани имаа можност меѓусебно да се запознаат, да проговорат за своите проблеми, да предложат и побараат решенија за надминување на истите, како и да преземат заеднички акции во насока на подобрување на интеракцијата и соработката помеѓу младите.
Истовремено, младите ги совладаа основните вештини за трансформација и решавање конфликти, јавно застапување и младински активизам. Преку изработката на Повелба за мир овие млади сакаат да им го свртат вниманието на локалните и национални власти, на државните институции, на родителите, на своите врсници и на јавноста, воопшто – кон предизвиците и проблемите со кои се соочуваат, растејќи, живеејќи и образувајќи се во мултетничките заедници. Повелбата за мир ги содржи нивните ставови и барања кои се однесуваат на мултиетничката интеграција и социјализација, образованието, како и на борбата за еднаквост, а против дискриминацијата, стереотипите и насилството.
Повелбата за мир ќе биде промовирана во рамки на завршниот настан организиран за презентација на резултатите од реализација на проектот „Зајакнување на соработката и дијалогот помеѓу заедниците преку Охридскиот рамковен договор (ОРД)” кој е финансиран од страна на ЕУ, претставена преку Делегацијата на ЕУ во Скопје, а е ко-финансиран од страна на шведската Агенција за меѓународен развој и соработка, Сида. Воедно проектот се спроведува од страна на Фондацијата Kvinna till Kvinna и Организација на жени „Кумановка” со времетраење од 27 месеци опфаќајќи ги општините Куманово, Крива Паланка, Старо Нагоричане, Липково и Кратово.
