Американскиот претседател, Доналд Трамп, и претседателот на Европската комисија, Жан-Клод Јункер, се согласија да работат на укинување на царинските давачки и намалување на трговските бариери.
– Денес се согласивме заедно да работиме во насока на укинување на царинските давачки, нецаринските бариери и грантови за неавтомобилските индустриски производи – изјави Трамп за новинарите во Белата куќа, стоејќи веднаш до Јункер, пренесува „Ројтерс“.
Трамп, исто така, кажа дека е договорена соработка со цел да се намалат бариерите и да се зголеми трговската размена во полето на услугите, хемикалиите, фармацијата, медицинските производи, како и сојата.
Според него, „ова е одличен ден за слободна и фер трговија”, а ќе се решаваат и прашањата за „царината на челик и алуминиум“.
Јункер рече дека договорот постигнат денеска ги исполнил неговите очекувања, објави АП.
