28 март, 2024
ПочетнаЕКОНОМИЈАМакедонија и Косово бараат решение за зголемените царини

Македонија и Косово бараат решение за зголемените царини

Во насока на решавање на проблемот со воведените зголемени царини од страна на Косово, министерот за земјоделство, шумарство и водостопанство, Љупчо Николовски, е во постојана комуникација со ресорните министри од Косово и регионот.

Владата прави сè за да не дојде во ситуација да воведуваме контрамерки како одговор на постапката на Косово. Очекуваме владата на Косово да ја повлече донесената мерка со што ќе го надминеме спорот, велат од Министерството.

В среда ќе има и заедничка средба на сите ресорни министри од регионот, на која како претставник од Македонија ќе биде министерот Николовски. На средбата ќе се бара заеднички модел како да се надмине овој проблем со Косово. Исто така, доколку не се надмине проблемот в среда, веќе во тек на наредните денови министрите за земјоделство и за економија, Љупчо Николовски и Крешник Бектеши, ќе се сретнат и со своите колеги – косовските ресорни министри, и на средбата ќе се бара начин за надминување на ситуацијата.

„Целта е укинување на одлуката и овозможување брз проток на стоки и услуги, како и трговска размена меѓу двете земји. Очекуваме да се постигне соодветен договор, во кој нема да има незадовлони страни и кој ќе биде од интерес на сите“, соопшти Министерството.

Минатата недела Министерството за земјоделство, шумарство и водостопанство и Министерството за економија испратија допис до ЦЕФТА, Европската Унија и до владата на Косово со кој се бара повлекување на одлуката на Косово за зголемување на царините за увозното овошје и зеленчук. Доколку и покрај сите напори и средби што престојат Косово не ја повлече одлуката, владата на Република Македонија ќе преземе мерки за заштита на домашното производство.

НАЈНОВИ ВЕСТИ

ХОРОСКОП