Претставничкиот дом на САД го одобри нацрт-законот за буџетот на Министерството за одбрана во износ од 675 милијарди долари, кој предвидува 2,6 проценти пораст на средствата за армијата, пренесоа американските медиуми.
Нацрт-законот беше усвоен со 359 гласови „за“, 49 „против“, и ќе оди на разгледување во Сенатот.
Вкупно 146 милијарди долари ќе бидат наменети за воена техника, вклучувајќи 22,7 милијарди за 12 брода, две подморници и три брода за водење на борби во крајбрежните зони.
Уште 9,4 милијарди долари се наменети за 93 авиони „Ф-35“ и 4 милијарди за „Блек Хок“, „Апачи“ и други.
Според републиканецот Кеј Грејнџер кој раководи со еден од поткомитетите за одбрана, законот обезбедува потребните ресурси „за одговор и одвраќање закани од земји како Русија, Кина, Иран и Северна Кореја, како и за спротивставување на екстремисти од целиот свет“.
Забрането е купување производи и услуги од телекомуникациските гиганти „ZTE“ и „Huawei“. „ZTE“ е обвинета за кршење на трговските закони за продажба на „чувствителна“ технологија во Северна Кореја и Иран.
„Huawei“ има врски со кинеската влада и се смета за закана за националната безбедност на САД.
