Канадските власти ги обвинија компаниите „Mars“ и „Nestle“, но и една мрежа на независни големопродажни дистрибутери дека заедно ги местат цените на чоколадите.
Истрагата е започната врз основа на информациите од инспекциите, а таа на виделина изнесе докази дека обвинетите се „здружиле, договориле и го аранжирале местењето на цените на чоколадите“, соопшти Бирото за заштита на пазарната конкуренција.
Обвинети се три бизнис лидери, поранешниот претседател на „Nestle Canada“ Роберт Леонид, поранешната претседателка на одделот за слатки во „Mars Canada“ Сандра Мартинез и шефот на канадскиот дистрибутер на храна „ITWAL“ Давид Глен Стивенс.
Доколку бидат осудени, тие би можеле да се соочат со казни во износ од 10 милиони канадски долари и казна затвор во траење до 5 години.
Лицата не сакаа да го коментираат обвинението, тие потенцираа дека ќе соработуваат во истрагата.
Компаниите, наводно, ги договарале цените на чоколадите на популарните брендови како што се „KitKat“, „Coffee Crips“, „Aero“, „Twix“, „Snickers“, „Bounty“ и „M&M“ во периодот од 2002 до 2008 година.
„Тешко е да се процени за колку точно се подигнати цените, поради сложеноста на постапката за пресметување на реалната цена на пазарот“, истакнаа од Бирото за заштита на пазарната конкуренција.
