На предлог на Mинистерството за економија на дневен ред на денешната седница на Владата се неколку предлог-закони, односно предлог-законите за изменување на Законите за безбедност на производите, за заштита на потрошувачите и на Законот за контрола на предметите од скапоцени метали.
Како материјал за информирање пред министрите ќе се најде информацијата за текот и прогресот на активностите во врска со проектот „Подобрување на квалитетот на податоците во катастарот“, како и информацијата од работната група за приоритетот „Младинска работа“ со конкретни предлози, план/програма за работа и очекувани идни активности од страна на Владата и другите државни институции.
Министрите на 70-тата седница ќе ја разгледуваат информацијата за степенот на реализација на активности од Националната програма за усвојување на правото на Европската Унија – ревизија 2017 година, предвидени за реализација заклучно со последниот квартал од 2017 година.
На предлог на Министерството за локална самоуправа, на дневен ред се и предлог-одлуките за доделување средства за финансирање проекти од развој на села 2018а година, како и за доделување средства за финансирање проекти од развој на плански региони 2018 година. Владата на барање на Собранието на денешната седница треба да даде и мислење за предлог-законот за изменување на Законот за акцизите.
