Мексиканскиот претседател Енрике Пења Нието во четвртокот изразил оптимизам во поглед на преговорите за НАФТА, кои неодамна беа ставени во неизвесност откако САД најавија истрага за увозот на странски автомобили, пренесува “Ројтерс“.
Мексиканскиот лидер рекол дека разговарал со својот канадски колега Џастин Трудо околу редефинирањето на 24 години стариот договор на кој се темели мексиканската економија, и дека трговските партнери ќе продолжат со блиската комуникација.
“Тој останува оптимист околу постигнувањето на договор за слободна трговија, кој ќе им биде од корист на трите држави“, соопштиле од канцеларијата на Пења Нието.
Разликите околу тоа како да се реконфигурира автомобилската индустрија го забавија напредокот околу редефинирањето на НАФТА, откако Мексико покажа флексибилност по прашањето, но одби целосно да ги прифати барањата на САД.
