Британската нафтена компанија „BP“ ќе инвестира 20 милиони долари во израелската компанија „StoreDot“, која тврди дека нејзините батерии можат да полнат електрични возила за пет минути, пренесува „CNBC“.
Нафтениот гигант соопшти дека нејзината единицата за капитал „BP Ventures“ инвестира во компанијата со седиште во Тел Авив која се стреми да ги намали емисиите на стакленички гасови во своите операции.
„Ултрабрзото полнење е во основата на стратегијата за електрификација на „BP“. Технологијата на „StoreDot“ покажува вистински потенцијал за автомобилските батерии кои можат да се полнат за исто време колку што е потребно за целосно полнење на резервоарот со гориво“, рече претставникот на „BP“, Туфан Ергинбилџик во соопштението.
Единицата за камиони на „Daimler“ прво инвестираше 60 милиони долари во „StoreDot“ во септември минатата година. Израелската компанија тврди дека батериите се еколошки и му овозможуваат на електричниот автомобил да помине над 483 километри откако таа е целосно наполнета.
„StoreDot“ развива т.н. „Флеш батерии“, литиум-јонски батерии кои според неа можат да ги полнат електрични возила за неколку минути. Батериите се напојуваат со органски супстанции и наноматеријали.
„StoreDot“ развива слична технологија за полнење на мобилните телефони за пет минути. Компанијата сака да го продава производот од 2019-та година.
Единицата за ризичен капитал на „BP“ инвестираше во почетокот на годината пет милиони долари во стартап компанијата „FreeWire“ која произведува мобилни станици за полнење на електрични возила.
