Економијата на Германија се забави повеќе од очекуваното во првиот квартал од годината, како во однос на последните три месеци од минатата година, така и на годишна основа, станува јасно од прелиминарните податоци на Федерално биро за статистика на земјата.
Во првото тримесечје од 2018-та година германската економија расте со 0,3%, што е под консензус прогноза на пазарот за раст од 0,4%. Ова е, исто така, најслаб раст од третиот квартал на 2016-та година. За споредба, во претходниот квартал најголемата економија во Европа забележа пораст од 0,6%.
На годишна основа, економијата на Германија порасна за 1,6%, но овој резултат е под прогнозата од 1,8%. Во последниот квартал од минатата година, во споредба со истиот период од 2016-та година, БДП-то се зголеми за 2,3%.
И покрај побавното темпо, економијата на Германија расте за 15-ти по ред квартал, а тоа придонесува за најдолгата фаза на раст од 1991-ва година, посочуваат од статистичката служба.
За растот на БДП-то во периодот јануари-март 2018-та година придонесе домашната побарувачка, при што домаќинствата малку ги зголемија трошоците за финалната потрошувачка.
Меѓу причините за забавување на темпото на раст на економијата, сепак е намалувањето на трошоците од страна на Владата за прв пат од пет години.
Според прелиминарните податоци на националната статистичка служба на земјата, меѓународната трговија исто така е помалку динамична.
Во првото тримесечје бројот на вработени луѓе во Германија се зголеми за 1,4% на годишна основа или 609.000 лица до 44,3 милиони лица.