Во Скопје денеска ќе се одржи тркалезна маса „Водење бизнис со почит за човековите права” во организација на Советот на Европа и со поддршка на „Хоризонталниот инструмент за Западен Балкан и Турција”, програмска рамка за соработка на Европската Унија и Советот на Европа.
Настанот е дел од програмата на Делегацијата на ЕУ за прослава на 9 Мај – Денот на Европа.
На настанот најавени се обраќања на министерот без ресор задолжен за регулатива за подобрување на инвестициската клима за домашните претпријатија Зоран Шапуриќ, шефот на програмската канцеларија на Советот на Европа, Моника Мартинез, националниот координатор за борба против трговијата со луѓе и илегална миграција Магдалена Несторовска и државниот секретар во Министерството за труд и социјална политика Елена Грозданова.
Целта е да се развие свеста и да се олесни дијалогот за значењето на ангажирање на приватниот сектор и синдикатите во превенцијата и борбата против трговијата со луѓе, како и да се согледаат добрите практики.
