Народната банка на Република Македонија ја задржува проекцијата на раст на БДП за годинава до 3,2 проценти и за наредната година до 3,5 проценти.
– Најновите проекции на НБРМ за следниот период вградуваат очекувања за стабилен домашен политички амбиент, приливи на нови странски инвестиции, повторно започнување на јавниот инфраструктурен циклус, како и поповолно надворешно опкружување. Евентуално неостварување на дел од овие претпоставки може да предизвика отстапување од очекувањата, рече на денешната прес-конференција гувернерот на НБРМ Димитар Богов
Во априлските проекции на НБРМ се очекува движечки фактор да бидат извозот, инвестициите – и јавните или капитални инвестиции, но и приватните и странските, како и личната потрошувачка.
– Општо земено проекциите упатуваат на потенцијал за солиден раст на домашната економија поддржан и од кредитната активност на банките отсуство на инфлациски притисоци и задржување на поволната надворешна позиција, рече Богов.
На прашањето на што се должи помалиот раст што за Македонија го проектираат меѓународните финансиски организации, Богов вели дека тоа е резултат на помалото ланско остварување од она што тие го имале предвидено. Растот беше помал од тој што го предвиделе и затоа проекциите за годинава се намалени.
За годинава останува и проекцијата на инфлацијата на околу два процента, а ризиците за проектираната патека на инфлацијата главно се поврзани со неизвесноста околу увезените цени.
Кај депозитите се очекува раст од 6,4 проценти за годинава и 6,5 проценти во наредната година. Кредитната активност на банките и натаму ќе биде важен фактор за поддршка на економскиот раст, при што за 2018 година се предвидува кредитен раст од 6,5 проценти за годинава и 7,7 проценти за наредната година.
