Во периодот од 01.01.2018 година до 31.03.2018 година НЛБ Банка АД Скопје оствари висока нето добивка во износ од 967.415 илјади денари или над 15 милиони евра што е повисока за 69,0% во однос на истиот период од лани.
Со 31.03.2018 година билансната сума достигна 75.100.693 илјади МКД, односно се намали за 654.951 илјади МКД или 0,9% во однос на 31.12.2017 година, што главно се должи на сезонски пад на депозитите од небанкарскиот сектор, коишто се намалија за 1.542.290 илјади МКД или 2,5% и изнесуваа 60.028.303 илјади МКД.
Вкупните кредити на небанкарскиот сектор се намалија за 915.500 илјади МКД или за 1,9% во однос на 31.12.2017 година и изнесуваат 47.801.324 илјади МКД, при што падот најмногу се должи на намалената состојба на кредити на нефинансиските друштва.
Нето каматните приходи, заклучно со 31.03.2018 година се повисоки за 2,1% споредено со истиот период од претходната година, при што приходите од камати се пониски за 0,6%, главно поради пониски каматни приходи од кредитите на нефинансиски правни лица, додека расходите по камати се пониски за 12,0%.
Нето приходите од провизии се повисоки за 16,4%, при што приходите од провизии се зголемени за 6,2% како резултат на остварен пораст во доменот на картичното работење, повисоки приходи од зголемениот број на корисници на трансакциски сметки, електронско банкарство и лично банкарство, како и повисоки приходи од провизии од продажба на полиси. Расходите за провизии се пониски за 13,6%, главно поради пониски расходи поврзани за картично работење и девизен платен промет.
Останатите некаматни приходи изнесуваат 439.024 илјади МКД и се повисоки за 512,2% во однос на истиот период претходната година, главно поради остварена капитална добивка од продажбата на НЛБ Нов пензиски фонд.
Вкупните приходи од работење изнесуваат 1.429.444 илјади МКД и се повисоки за 41,6% во однос на истиот период претходната година.
Вкупните оперативни трошоци изнесуваат 430.323 илјади МКД и се повисоки за 3,8%. Трошоците за вработени се повисоки за 16,8%, трошоците за амортизација се повисоки за 2,9%, додека останатите расходи од дејност се пониски за 7,5% во однос на истиот период претходната година.
Заклучно со 31.03.2018, беа издвоени Исправки на вредноста на финансиските средства, на нето основа во позитивен износ од 80.709 илјади МКД, што е повеќе за 26,4% споредено со истиот период од претходната година. Исправките на вредност на финансиските средства соодветствуваат на структурата и на квалитетот на пласманите на Банката. Исправките на вредност на нефинансиски средства изнесуваа 4.924 илјади МКД и се пониски за 84% во однос на истиот период 2017, поради помали трошоци за оштетувања на нефинансиските средства во 2017 година.
Комплетниот финансиски извештај можете да го погледнете тука.
