Приходите на „Нетфликс“ во изминатите три месеци достигнаа 3,7 милијарди долари, 40 отсто повеќе од лани, што е најбрз раст на приходите во историјата на компанијата. Значително пораснал и бројот на претплатници на нејзината услуга за интернет-телевизија.
Според извештајот на „Нетфликс“, бројот на претплатници пораснал 7,4 милиони, околу милион повеќе од очекуваното, што е 63 отсто повеќе во однос на истиот период лани. Сега има вкупно 125 милиони корисници во светот.
Од „Нетфликс“ порачале дека ќе продолжат со зголемување на инветициите во создавање оригинални содржини, а дека ќе ги намалат лиценцираните содржини. Оваа година компанијата планира да вложи осум милијарди долари во телевизиска програма и филмови.
За брзото ширење на „Нетфликс“ во светот, која услугите ги нуди во 190 држави, укажува и податокот дека сега повеќе од половина од претплатниците се надвор од САД. Пазарната вредност на „Нетфликс“ достигна 137 милијарди долари, двојно повеќе од лани.