Европската комисија денес започна истрагата за заштитните мерки за увоз на неколку производи од челик во Европската унија, соопшти прес-службата на Комисијата.
Истрагата е една од трите видови мерки што Комисијата ги објави како одговор на ограничувањата за увоз на челик и алуминиум воведени од САД. Таа влијае на производите од секакво потекло и не ги предодредува резултатите, коментира Комисијата.
Меѓутоа, постапката може да резултира со наметнување на увозни давачки или квоти за заштита на производителите на ЕУ од прекумерен увоз, доколку е потребно.
Системот за следење на увозот на челик, воведен во март 2016-та година, обезбедува доказ дека увозот на одредени производи од челик расте. Овој тренд може да биде уште посилен сега кога пристапот до американскиот пазар е ограничен, а производите од други делови на светот се пренасочуваат кон Европа.
Да потсетиме дека американскиот претседател Доналд Трамп одлучи да наметне 25% царина за увоз на челик и 10% за увоз на алуминиум, иако во моментов ја исклучи ЕУ од рестриктивни мерки.
Истрагата, која започна денес, опфаќа 27 категории на производи од челик. Треба да биде завршена за 9 месеци, и ако се потребни мерки на претпазливост, тие ќе бидат усвоени навреме, соопшти Комисијата.
ЕК продолжува да ја следи состојбата на пазарот и е подготвена да дејствува доколку е потребно. Истрагите се еден од инструментите за трговска одбрана признати од Светската трговска организација.
