На денешниот состанок на ИПА-мониторинг комитет за ИПА I и II, со кој претседаваа заменик-претседателот на Владата на Република Македонија задолжен за европски прашања, Бујар Османи, во улога национален ИПА-координатор, и раководителот на одделение во ДГ НЕАР, Дејвид Кулен, беа споделени информации за напредокот во спроведување на ИПА во двете финансиски перспективи.
Целта на состанокот исто така беше и да се договорат заклучоци и препораки за подобрување на апсорпциски капацитети за искористување на сите средства алоцирани преку ИПА.
„Се наоѓаме во исклучително важен период, година во која имаме обврска да ги завршиме клучните инфраструктурни проекти и да ги пуштиме во функција“, истакна Османи додавајќи дека темпото останува високо и во следната година, кога се очекува да ги затвориме програмите од ИПА 2007-2013.
Османи ја истакна потребата за засилена имплементација на проектите и програмите, кои се веќе испрограмирани преку ИПА 2014-2020 година и најави конечно сумирање на впечатоците и научените лекции од досегашните предизвици при спроведување на ИПА, како важен инпут во подготовката за новата ИПА по 2020 година.
На состанокот присуствуваа претставници од државните институции кои спроведуваат ИПА-фондови, претставници на Делегацијата на ЕУ, Секретаријатот за европски прашања, Министерството за финансии, како и претставници на секторските работни групи, и на донаторите кои се активни во земјата.
ИПА-мониторинг комитетот е воспоставен во 2016 година и се одржува на годишно ниво.
