Поден наместо кафезен систем за одгледување несилки предвидуваат измените во Законот за благосостојба на животните. Ова, според Агенцијата за храна и ветеринарство, ќе ја зголеми цената на јајцата, бидејќи продукцијата при ваквиот начин на производство е помала.
Законските измени треба да се донесат најдоцна до јули годинава, но рокот за воведувањето на оваа новина е пролонгиран и треба да се реализира најдоцна шест месеци до влезот на Македонија во ЕУ.
Како што рече денеска директорот на Агенцијата за храна и ветеринарство Дејан Рунтевски, со измените на Законот ќе се забрани одгледувањето животни за произведување крзно, како и за нивно користење во циркус. Посебна, независна, стручна комисија ќе одлучува и како ќе се третираат животните, дали и колку ќе може да се користат во научни цели.
Рунтевски на средба со новинарите информира и дека кланиците ќе треба да назначат одговорно лице за заштита и благосостојба на животните кое ќе биде претходно обучено и со стекнат соодветен сертификат. Тоа, пак, ќе треба да гарантира дека персоналот во кланицата работи согласно законот и прописите и дека постапува според стандардните оперативни процедури.
Законските измени, потенцира директорот, се пред се во насока на усогласување со европската регулатива.
