Во Скопје продолжува акцијата за поставување на заштитни столпчиња по должината на повеќе улици и булевари во централното градско подрачје, со цел зголемување на безбедноста на сите учесници во сообраќајот и овозможување непречено движење на пешаците. Во оваа акција во изминативе два месеца се поставени околу 300 заштитни столпчиња, информираат од Град Скопје.
Како што соопштуваат оттаму, екипите на ЈП „Улици и патишта“ извршуваат градежни активности за поставување заштитни столпчиња на тротоарите на булеварот „Свети Климент Охридски“, на потегот од крстосницата со улица „Свети Кирил и Методиј“ до крстосницата со улица „Димитрие Чуповски“. Досега се завршени градежните работи од едната страна на булеварот (пред Европскиот факултет), каде што се поставени 126 заштитни столпчиња, а во моментов се извршуваат градежни работи од другата страна на булеварот, каде што треба да се постават дваесеттина столпчиња.
Изминатиов период, во рамките на оваа акција столпчиња беа поставени и по должината на улицата „Димитрија Чуповски“, пред Министерството за правда, како и по должината на булеварот „Митрополит Теодосиј Гологанов“, пред објектот на поранешна „Нова Македонија“.
