„Улицата на радоста”, новогодишниот базар во организација на Град Скопје и Конгресен центар „Александар Македонски“, кој е поставен на плоштадот „Македонија“, на само неколку денови пред најлудата ноќ ќе биде збогатен со нови и интересни содржини, информираат од Градот.
Имено, од четврток па се до 30 декември, на плоштад „Македонија“ во два термина дневно (13 и 18 часот) најмладите ќе може да се забавуваат со Дедо Мраз и неговата дружина составена од Белата и Темната Кралица, Ангелите и Џуџињата. Станува збор за претставата „Дедо Мраз во пензија” која е збогатена со раскошни костими, убава музика и одлична актерска игра. Главните улоги ги играат Војо Цветановски, Тамара Ристоска и Маријана Станојковска.
Дополнително, ликовите од претставата задно со 12 музичари ќе направат голема новогодишна парада и заедно со дечињата ќе прошетаат по улица „Македонија“.
Традиционалното пристигнување на Дедо Мраз на плоштад „Македонија“ е закажано за 31 декември од 12 часот, а од Град Скопје велат дека се погрижиле и годинава тој да пристигне на необичен начин кој ќе биде изненадување за сите посетители.
Град Скопје ги поканува сите сограѓани и оние што ќе престојуваат во Скопје за празниците да ја посетат „Улицата на радоста” и да ја почувствуваат новогодишната магија.