Денеска во 18 часот во Кино Култура ќе се одржи традиционалната приредба на германски јазик „Das Weihnachtsabenteuer“/„Божиќна авантура“ во организација на Германскиот јазичен центари Здружението за дислексија Ајнштајн.
Со оваа приредба организаторите имаат за цел на најмладите да им приредат едночасовен спектакл со многу песнички и рецитали, а во исто време заедно со присутните да ја подигнеме јавната свест за дислексијата. Со заедничкиот настап сакаме кај децата уште од најмала возраст да го стимулираме чувството за меѓусебна грижа и радување на најблиските.
На настанот очекуваме ококу 500 посетители да ја споделат магичната божиќна атмосфера со нашите 100 учесници на возраст од 4-14 години, кои ќе пеат, рецитираат и глумат на германски и македонски јазик.
Влезот е слободен и отворен за сите заинтересирани.
Германскиот јазичен центар претставува едукативен центар специјализиран за германски јазик креиран според европските стандарди за квалитет и единствен од ваков вид во Македонија. Истиот е основан во август 2008 година. Наша мисија е создавање и одржување на нивото на висококвалитетни услуги на наставата на германски како странски јазик по највисоки професионални и етички стандарди. Нашата цел не е само совладување на јазикот туку и стекнување на квалитетни алатки за комуникација во општеството во кое живееме.
Здружението за дислексија Ајнштајн е непрофитна организација формирана во Декември 2013 година од родители на деца со дислексија и лица со дислексија. Идејата за формирање на здружението произлезе пред се од недостигот на информации за дислексијата. Барајќи решение и помош за тешкотиите со читање кај своите деца родителите се соочија со неинформираност на институциите и недоволна стручност кај просветните работници. Ние постoиме со цел да помогнеме на илјадници лица кои се соочуваат со проблемот дислексија и истата да ја актуелизираме во нашата држава.
