Градинките „Орце Николов“ во Карпош 2 и „Мајски цвет“ во Тафталиџе 2 ќе добијат прочистувачи за воздух, кои ќе ги користат на неопределено време.
Ваквата одлука беше донесена на денешната седница на Советот на Општина Карпош, а на предлог на градоначалникот Стефан Богоев.
„Локалната самоуправа ќе им отстапи три јонизатори (прочистувачи на воздухот), на две претшколски установи кои функционираат на територија на општината. Клонот на градинката ‘Орце Николов’ во Карпош 2 ќе добие еден, а клонот на градинката ‘Мајски цвет’ во Тафталиџе 2 ќе добие два јонизатори за воздух, кои ќе ги користат на неопределено време“, соопшти Општината.
Богоев на почетокот на овој месец на „Твитер“ објави фотографии од апарат за прочистување на воздухот што го користел неговиот претходник, Стевчо Јакимовски. Тогаш најави дека апаратот ќе биде дониран на некоја од градинките во општината.
