Владата на вчерашната седница ја разгледа информацијата за основање специјализирана национална математичка гимназија во Скопје и го задолжи Министерството за образование и наука да подготви анализа и да достави предлог со активности за нејзино основање.
На оваа 40-та редовна седница Владата ја разгледа информацијата за реализација на проектот за користење услуга за одмор и рекреација на деца од семејства во социјален ризик и деца корисници на посебен додаток за зимата 2018 година. Владата го задолжи Министерството за труд и социјална политика во рок од 5 дена да донесе процедура за реализација на проектот за користење на услугата за одмор и рекреација на деца од семејства во социјален ризик и деца корисници на посебен додаток за време на зимскиот распуст во учебната 2017/2018 година.
По предлог на Министерството за образование и наука на денешната седница Владата ги разгледа информацијата за резултатите што ги постигнале учениците од Македонија во меѓународните програми за оценување (PISA и TIMSS) и реформите што произлегуваат од постигнатите резултати, како и информацијата за текот и прогресот на активностите во врска со проектот „Намалување на партиципацијата за 50 отсто на студентите од самохрани и еднородителски семејства“.
Владата вчера ја прифати ургенцијата по иницијативата за измена и дополнување закони и други подзаконски акти доставена од Народниот правобранител на Република Македонија со цел спречување на последиците од склучување малолетнички бракови.
Како што информираат од Владата, усвоена е и информацијата за одлуката на Комитетот за светско наследство на УНЕСКО во однос на состојбата со природното и културното наследство на Охридскиот Регион и го задолжи Министерството за култура да формира работна група со цел изработка на акциски план за постапување по одлуките што произлегуваат од 41. сесија на Комитетот за светско наследство на УНЕСКО.