Склучени се седум договори за трговија на македонски со кинески компании на Б2Б средбите во рамки на Економскиот и трговски форум на шестиот Самит на шефовите на Влади на Кина и шестнаесет земји од централна и источна Европа, информираат од Сојузот на стопански комори на Македонија.
Компаниите кои ги склучија договорите како резултат на конкретно вмрежување доаѓаат од секторите земјоделство, градежништво, автомобилска индустрија, проектирање и планирање.
„Договорите значат промоција, унапредување и зацврстување на билатералната бизнис-соработка. За првпат целиот бизнис-форум беше реализиран преку договорени средби на компаниите од НР Кина и 16 земји од ЦИЕ. Како резултат на напорните четири месеци работа во изминатиот период, договорите се круна на остварената соработка. Ни следи голем проект за економска соработка со НР Кина и земјите од ЦИЕ со фокус на примена на високи технологии во повеќе сектори како ИКТ, земјоделство, здравство, животна средина“, изјави Данела Арсовска од ССК и додаде дека уште од следната недела се очекува да почне реализација на договорите со цел зголемување на соработката.
Покрај трговијата, се очекува и директните инвестиции а бидат главен двигател на економската соработка меѓу Народна Република Кина и земјите од ЦИЕ. Во 2016 година по однос на вкупната надворешно-трговска размена, Кина е седмиот трговски партнер на Република Македонија. Вкупната трговска размена минатата година, според официјалните статистички податоци, изнесувала 469 милиони американски долари. Притоа, остварен е извоз во вредност од 47,8 милиони долари, а увоз од 421,2 милиони американски долари.
