Премиерот Зоран Заев, заедно со владиниот економски тим, вчера во Будимпешта оствари средба со потпретседателот на бордот на директори на компанијата „Чајна енерџи“, Динг Јанжанг, и други претставници на менаџментот на компанијата.
„Од компанијата, која има отворено свое претставништво во Скопје, истакнаа дека се создадени услови за инвестициски циклус во секторите енергетика и транспорт. Компанијата ги следи активностите на новата Влада и најави учество на 5 проекти во претстојниот период. Премиерот Заев ги охрабри да учествуваат во постапките што следуваат во претстојниот период, посебно за проекти од областа на инфраструктурата и енергетиката“, соопшти владината прес-служба.
Од таму наведуваат дека на средбата се разговарало и за новите владини политики за економски раст и привлекување нови инвестиции за кои, како што се вели во соопштението, претставниците на кинеската компанија покажале сериозен интерес.
