„Time Inc.“ ќе биде продаден за 1,84 милијарди американски долари на американскиот ривал „Meredith“, објавија компаниите. Купувачот со седиште во Ајова ќе биде финансиски поддржан од браќата Чарлс и Дејвид Кох.
Земајќи ги во предвид и наталожените обврски, „Time“ се проценува на 2,8 милијарди долари, објавија двете компании во неделата. Договорот се очекува да се затвори до крајот на првиот календарски квартал од 2018-та година.
„Meredith“ ќе плати 18,50 долари за сите останати акции на „Time Inc.“.
„Time Inc.“ беше одделен во 2014-та година од страна на „Time Warner“, медиумскиот и забавен концерн. Освен истоименото списание издавачката куќа е позната и со списанијата „Sports Illustrated“ и „Fortune“.
Во последните години, сепак компанијата падна во тешкотии, бидејќи тиражот бележи пад, како и бројот на реклами. Во третиот квартал, приходите паднаа за 10 отсто на 679 милиони долари. Менаџментот на „Time“ реагираше со намалување на трошоците, нова дигитална стратегија и дури размислуваше за продажба на одделни списанија.
Купувањето е успех за медиумскиот гигант. Претходно, „Meredith“ на два пати не успеа да преговара за „Time Inc.“.
„Meredith“ додава дека индустриското семејство Кох, сопственик на „Koch Industries“ и некое со поддршката за конзервативците, исто е кредитор на трансакцијата, но нема да се здобие со право да се меша во новинарските работи и одлуките на менаџментот.
Во минатото Кох имаа интерес за купување на голем број медиуми, меѓу кои весниците „Los Angeles Times“ и „Chicago Tribune“.
„Meredith“ истакнува дека „Koch Equity Development“, инвестициската единица на „Koch Industries“, ќе го финансира договорот со 650 милиони долари.
Меѓу брендови на „Meredith“ се „Better Homes & Gardens“, „Allrecipes“, „Parents“ и „Shape“. Компанијата, исто така, има 17 локални новински станици на 12 пазари.
По трансакцијата „Meredith“ очекува штедење во износ од помеѓу 400 и 500 милиони долари за првите две години по трансакцијата. По купувањето на изданијата на двете компании заедно ќе стигнат до 200 милиони корисници, а дигиталниот медиумски бизнис ќе достигне до 170 милиони месечни единствени корисници во САД.
„Meredith“ и „Time Inc.“ генерираа вкупни приходи од 4,8 милијарди долари во 2016-та година, вклучувајќи ги општите рекламни приходи од 2,7 милијарди долари (700 милиони долари биле од дигиталната реклама) и чист оперативен профит од 800 милиони долари.