На 10 декември ќе се одржи првиот концерт во Делчево организиран во рамки на манифестацијата „Есенски џез караван“ по што следат Богданци, Пробиштип и Крушево.
За почеток на караванот се резервирани младите, атрактивни и енергични Fierce и MusaIQ, кои ќе настапат во Салата во Спомен-домот АСНОМ во Делчево со почеток во 20 часот.
Музиката што MusaiQ ја креира претставува легура од стилови поврзани со специфична нишка која всушност е срцето на овој состав. Македонскиот фолклор, како непресушна ризница на инспирација, е поводот за издавање на првата обработка на познато македонско фолклорно дело (Со маки сум се родила), но не и рамка на движење или изведување на некаков протокол. Опусот на составот е многубоен колаж на жанрови, како што се издиференцираните карактеристики на самите членови. Самиот состав функционира околу 2 години, но индивидуалното портфолио на членовите врши и повеќе од израмнување на равенката за уметничко искуство. Во овој интересен прогресивен бенд членуваат Калина Велковска – вокал , Петар Лукиќ – клавијатура, Иван Петровски – гитара , Никола Бочваров – бас и Александар Ванчовски – тапани.
Fierce се дел од најмладата генерација македонски џез-музичари кои енормно брзо ја освоија публиката. Нивниот звук се движи во границите на современиот џез вклучувајќи силни и иновативни рифови, ритми и мелодии. Имаат настапувано на реномирани фестивали и настани во и надвор од државата.
Бендот го сочинуваат Горјан Стојменовски (гитара), Виктор Филиповски (тапани), Марко Василевски (контрабас), Борислав Веселинов (саксофон) и Сенад Усеин (труба). Fierce се моментално актуелни со својот прв албум.
Манифестацијата „Есенскиот џез караван“ е поддржана од Министерството за култура и влегува во програмата на проектот „Нов културен бран“.