Изминативе денови мерните единици покажуваат значително покачување на загаденоста на воздухот во Скопје.
Вчера вечерта во Карпош беа измерени 222 ПМ10 честички, во Центар 152, Ректорат 193, а најзагадено покажа во Лисиче со измерени над 250 ПМ10 канцерогени честички.
Ништо подобро не покажаа и мерните станици во другите градови низ Македонија.
Македонија се гуши во сѐ позагадениот воздух, властите сеуште без конкретни мерки.
„Веќе 6 месеци СДС ветува, но нема ништо преземено за да се намали загадувањето на воздухот во Република Македонија. Целокупната одговорност и сите институции кои треба да реагираат се во рацете на СДС. Потребни се мерки веднаш. Стоп за популизмот, и лажните ветувања. Во прашање е здравјето на илјадници граѓани. Наместо евтин популизам и декларативни заложби потребно е итно дејствување. Пред сѐ Владата, но и Шилегов и останатите градоначалници на СДС наместо парадариње треба да си ги засукаат ракавите и да почнат да преземаат мерки за почист воздух. Граѓаните очекуваат резултати. СДС во текот на изборната кампања на граѓаните им ветуваше подобрување на животната средина и почист воздух. Но веднаш по изборите се покажа дека тоа беше уште една нивна лага и манипулација за собирање на повеќе гласови“, соопшти ВМРО-ДПМНЕ.
