Еден од најдобрите пијанисти на денешницата, Борис Березовски од Русија, ќе одржи концерт со наслов „На руски начин“ на 9 ноември (четврток) во 20 часот во Македонската филхармонија.
Музичката критика е едногласна во мислењето дека Березовски во моментот е еден од најмоќните пијанисти кој поседува уникатна техника и сензитивност, кој има специфичен пристап кон пијаното и, воопшто, кон музиката што ја изведува.
Македонската публика имаше можност да го слуша на јубилејниот концерт – 70 години од формирањето на оваа институција.
Маестралниот Березовски ќе го свири најпопуларниот Концерт за пијано и оркестар бр. 3 од Сергеј Рахманинов познат како „РАХ3“.
Диригент и овој пат ќе биде миленикот на македонската публика, маестро Емил Табаков од Бугарија, а оваа вечер ќе бидат изведени и увертирата-фантазија „Ромео и Јулија“ од Чајковски, како и сатиричната свита „Вљубен во три портокали“ од Сергеј Прокофјев.
Не пропуштајте ја оваа единствена изведба!
Билетите се веќе достапни и може да се набават на билетарницата во Македонската филхармонија, да се резервираат на тел: 02/3238 182 или да се купат преку веб-страниците www.mktickets.mk и www.karti.com.mk.