Министерот за информатичко општество и администрација, Дамјан Манчевски, денеска се сретна со германскиот амбасадор во Македонија, Томас Герберих.
Амбасадорот Герберих ги поздрави реформите на кои работи Владата на Република Македонија и Министерството за информатичко општество. Како што истакна амбасадорот Герберих, за него како нов амбасадор во земјава од особено значење е отвореноста на Владата за комуникација и соработка.
Министерот Манчевски ги претстави проектите на кои во моментов работи Министерството за информатичко општество. Тој се осврна на процесот на подготовка за Стратегијата за реформи во јавната администрација и функционалната анализа, што ќе резултира со реорганизација на администрацијата.
„Дигитализацијата е главна алатка за реформи во јавната администрација. Во тој контекст работиме на Регистарот на население и зголемување на бројот на е-сервиси, односно услуги што граѓаните ќе ги добиваат по електронски пат“, посочи министерот Манчевски.
На средбата се разговараше и за подготовката на предлог-законот за измени и дополнување на Законот за АВМУ, процес каде што се вклучени сите засегнати страни.
Заклучокот од состанокот беше дека МИОА и германската амбасада ќе продолжат со успешната соработка, а во наредниот период ќе бидат дефинирани и конкретни заеднички активности.