Јужнокорејскиот производител Хјундаи објави дека го произвеле милионитиот автомобил во својата прва европска фабрика која се наоѓа во Чешка. Јубулејниот примерок е моделот i30.
Покрај овој модел кој се произведува во три варијанти, хечбек со 3 и 5 врати и караван верзија, во Чешка се изработуваат и возилото „MPV“, моделот ix20 и кросоверот ix35.
Фабриката во Чешка е завршена во септември 2009-та година, а инвестицијата беше вредна 1.12 милијарди евра. Меѓутоа производството на возила започна една година претходно, пред погонот да биде комплетно завршен и ставен во функција. Инаку годишниот капацитет на оваа фабрика е околу 330.000 возила.
Компанијата Хјундаи располага со фабрика и во соседна Словачка која ги изработува и моделите од марката Киа, а во 2012-та година беа произведени рекордни 292.050 возила или 15 проценти повеќе отколку во 2011-та година.