На 10 октомври, во 20 часот во Музејот на град Скопје ќе се отвори изложбата на избрани дела на Јован Миронски.
„Ликовно творештво на Јован Миронски ретко било забележано на некои групни изложби и оваа ретроспективна поставка е прва можност реално да се согледаат и да се забележат достигнатите вредности. Можно е да се дојде до заклучокот дека Миронски, како и генерацијата ликовни уметници кои паралелно почнуваат да работат со него, веќе во образовниот процес биле насочувани кон модернистичките ликовни модели кои тие подоцна ги разработиле, некои од нив и ги радикализирале, и во низата години што следувале темелно го промениле ликовниот профил на средината. За сето ова да биде возможно морало да биде присутен еден основен елемент – нивната отвореност и подготвеност за прифаќање на модернизмот и модерноста на општеството. Тие таквата отвореност ја имале во себе“, се вели во најавата за изложбата на Миронски.