Легендата на францускиот и европскиот театар, Марсел Бозоне, кој половина век со своите креации оствари брилијантна уметничка одисеја, на 6 јули во 21 часот во амфитеатарот во Ресен ќе биде прогласен за актер на Европа 2017.
Во присуство на амбасадорот на Франција и претседателот на Светската асоцијација на театарски критичари, Жорж Бани, ќе биде прикажан документарен филм за лауреатот Бозоне, а во чест на јубилејот на фестивалот ректорот на Универзитетот за аудиовизуелни уметности, Јордан Плевнеш, и ректорот на Националниот универзитетот за филм и театар од Букурешт, Николае Мандеа, ќе потпишат меморандум за заедничка соработка.
По повод јубилејот ќе бидат доделени три големи повелби „Балканот – срцето на Европа“ на личности што оствариле капитален придонес во основањето и развојот на фестивалот. Од Македонија ова високо признание ќе го добие поранешниот министер за култура и долгогодишен селектор на фестивалот, Благоја Стефановски, потоа публицистот од Косово, Ќани Мехмеди, и актерката од Грција, Криса Јоаниду.
Натпреварувачкиот дел ќе биде отворен со претставата „Идиот“ според делото на Достоевски, во изведба на академскиот театар од Букурешт, а во следните денови на фестивалот ќе бидат презентирани ексклузивни театарски остварувања од Бугарија, Косово, Србија, Франција, Грција, Хрватска. Жирито со кое претседава Мето Јовановски на завршната вечер ќе ги прогласи победниците.
