Вечерва (3-ти Октомври, 2017 година), со почеток во 20 часот, уметниците Димитар Кочевски – Мичо, Свето Манев и Илија Кочовски кои творат како ликовна група „77“, ќе ја презентираат својата ретроспективната поставка одбележувајќи 40 години заедничка работа.
Тројцата членови на „Група 77“ за досегашното творештво се закитиле со низа признанија. Димитар Мичо Кочевски е добитник на наградата за најдобар театарски плакат на „Војдан Чернодрински“, како и на ноемвриската награда на град Битола. Илија Кочовски е осовојувач на наградите Екс Либрис во Риека, како и на откупната награда на НУБ „Климент Охридски“, на 30 графичка изложба на ДЛУМ. Свето Манев е добитник на наградата „Лазар Личеновски“ за сликарство на 15 зимски салон на ДЛУМ и на „Методија Ивановски Менде“ на 26 изложба „Сликарство мал формат“.
Со самата појава на ликовната „Група 77“ во 1977 година се наѕира и нивната порака за многу посмел и многу посовремен пристап во откривањето на нови можности во ликовниот пристап и на полето на тематската и на колористичката ангажираност, се разбира, кај секој од нив со посебен ликовен израз во зависност од ликовниот афинитет. Тие смело ги прифатија новите стремежи во ликовното творештво, надминувајќи го традиционалното со свеж израз на поинаков светоглед, со поинакви и посовремени асоцијативни елементи.
Секој член од оваа елитна ликовна група има свое видување, нуди свој специфичен ликовен репертоар со проверени и докажани ликовни вредности со посебен и особен израз, естетика, ликовна индивидуалност, ангажираност и дијаметрално различни творечки инспирации. И кај секој од нив, индивидуалниот ликовен егзистенцијализам е различно сфатен и никој никому не нуди правец и стил, зашто и правецот и стилот се само индивидуален и израз и одраз на платното поставено на сопствениот штафелај и секој слободен во својата имагинација и сопствената креативна идеја и визија.
Димитар Кочевски – Мичо, Свето Манев и Илија Кочовски се појавија како нова ликовна авангарда не само во ликовниот живот на Битола, туку и многу пошироко, за нивната уметничка ликовна дејност да почне да блеска во просторот и низ времето и да трае полни четириесет години.
