Коалицијата за чист воздух „О2“ и Првата детска амбасада во светот „Меѓаши“ заедно со уште 18 граѓански невладини организации ги повикуваат граѓаните на марш за правото на чист воздух кој ќе се одржи утре (четврток, 21 септември) од 17 часот на повеќе булевари во Скопје.
Почетна точка на акцијата е Владата на РМ, по што ќе се помине на булеварот Илинден и булеварот 8 Септември каде што учесниците ќе се спојат со партнерските граѓански организации „Ние сме Карпош 4“ и „Карпош 3“, кои исто така ќе имаат мирен протест.
“Сметаме дека токму овој период е исклучително важен за да се чуе гласот на граѓаните кои буквално во сите поголеми градови во Македонија – Скопје, Тетово, Битола, Кичево, Струга, Куманово, Кавадарци – директно ги чувствуваат последиците на токсичниот воздух. Сметаме дека овој период е особено важен пред новите локални власти да се позиционираат за да може сериозно да го сфатат проблемот и заедно со централната власт да може да преземат итни, но и краткорочни, а понатаму и систем на долгорочни мерки за решавање на проблемот” – изјави Ели Пешева од коалицијата „О2“.
Коалицијата „О2“ имаше средби со повеќе граѓански иницијативи и организации, речиси 20, и досега се дефинирани мерки што веќе се доставени до Министерството за животна средина, а ќе бидат доставени и до сите кандидати за градоначалници од сите партии, во обид тие да бидат реализирани во текот на нивните потенцијални мандати.
Истражувањата на Светската здравствена организација за 2012 година покажаа дека аерозагадувањето во Македонија е причинител на повеќе од 2.836 смртни случаи годишно. Европската агенција за животна средина (ЕЕА) во 2013, пак, смртта на 3.360 лица ја препишува на изложеноста на ПМ 2,5-честички. Една од најпогодените категории од проблемите со воздухот се децата.
“Иако според Уставот на РМ здравата животна средина му е загарантирана на секој граѓанин на нашата земја, во последните години сите сме сведоци дека во реалноста не е така. Сите живееме заедно во оваа мала земја со големо загадување и, без оглед на сите разлики, воздухот ни е можеби единствената заедничка спојка и токму затоа треба постојано да инсистираме на севкупно подигнување на еколошката свест. Бидејќи проблемот е директно поврзан со здравјето и наједноставно се работи за живот или смрт” – посочуваат организаторите пред утрешниот марш.