Министерот за земјоделство, шумарство и водостопанство, Љупчо Николовски, денеска учествуваше на работилницата во рамки на проектот „Намалување на ранливоста на земјоделството од климатските промени“, поддржан од Организацијата за земјоделство и храна при Обединетите нации (ФАО).
Како конкретни чекори во справување со негативното влијание на климатските промени врз земјоделството, министерот Николовски ги наведе: дефинирање на мерките за прилагодување кон климатските промени и нивно интегрирање во програмите за финансиска поддршка на Министерството и воспоставување соодветен институционален капацитет и негово зајакнување преку серија обуки со што би се овозможило креирање и ефикасно спроведување на политиките за прилагодување кон климатските промени.
При тоа министерот Николовски посочи дека во рамки на „Проектот за намалување на негативното влијание од климатските промени, поддржан од ФАО, веќе се набавени модерни агрометеоролошки станици, кои деновиве ќе бидат инсталирани на три локации: Градско, Кочани и Струмица, а ќе бидат управувани од Управата за хидрометеоролошки работи.
„Во овие три производни региони, каде што се произведуваат стратешки земјоделски култури: градинарски, овошни и ориз, е многу важно редовното следење на временските состојби, а информациите ќе бидат достапни до земјоделците преку новоотворената веб-страница на УХМР, на која покрај временската прогноза и сезонските прогнози, на едноставен и разбирлив начин ќе бидат презентирани и други информации кои им се потребни на земјоделците за преземање соодветни агротехнички мерки“, изјави Николовски.
Воедно министерот истакна дека МЗШВ сериозно се залага за приближување на политиките кон препораките од оваа област. Во таа насока преку Програмата за рурален развој, а земајќи ја предвид сериозноста на влијанието на климатските промени врз земјоделското производство, кое е наша стратешка определба, ќе бидат издвоени два милиони денари за реновирање на метеоролошките станици во Крива Паланка, Штип и Демир Капија.
Со проектот исто така се преземаат активности за поддршка на средните земјоделски училишта кои вклучуваат воведување нови наставни материјали за климатските промени, како дополнување на постоечките наставни програми и обуки за наставниците.
На работилницата беше истакнато дека негативните влијанија на климатските промени претставуваат голема закана за земјоделското производство бидејќи земјоделството е еден од најранливите сектори во економијата во Република Македонија, а притоа се загрозени главните земјоделски региони и стратешките земјоделски култури. Македонија се наоѓа во регионот на Југоисточна Европа каде што се очекуваат големи промени на климата, а со тоа и сериозни последици врз производството на храна. Министерот Николовски посочи дека е неопходно преземање ефективни мерки за ублажување на последиците, што претставува приоритет во идниот период на МЗШВ, поради важноста на земјоделското производство за животот во руралните средини, социјалната сигурност и намалувањето на сиромаштијата.
