Бензините од денес поскапуваат половина денар за литар, а цената на дизелот се зголемува 1,5 денар, соопшти Регулаторната комисија за енергетика.
Со одлуката се врши зголемување на рафинериските и на малопродажните цени на нафтените деривати во просек 3,45, односно 2,36 отсто.
Новата малопродажна цена на „евросупер БС-95“ ќе изнесува 63,5 денари за литар, а „евросупер БС-98“ ќе се продава за 65 денари. Малопродажната цена на „евродизелот“ (Д-Е V) ќе биде 49,5, а екстра-лесното масло за домаќинство (ЕЛ-1) ќе чини 38,5 денари за литар.
Со одлуката на РКЕ за 0,656 денари за килограм се зголемува и малопродажната цена на мазутот М-1 НС и ќе изнесува 24,537 денари за килограм.
Како причина за зголемувањето на малопродажните цени на нафтените деривати од РКЕ ги посочуваат 5,14 отсто повисоката просечна цена на суровата нафта на светскиот пазар во изминатите 14 дена и 0,759 отсто понискиот курс на доларот во однос на денарот.
