Фабриката на германскиот бренд во автомобилската индустрија „ОДВ Електрик“ во ТИРЗ Охрид- Струга, што започна да се гради кон крајот на 2015 година, денеска ќе почне со работа, објави на својот фејсбук-профил лидерот на ВМРО-ДПМНЕ, Никола Груевски.
Во следните неколку години планирано е во фабриката да бидат вработени околу 1.000 луѓе.
„Бев многу среќен бидејќи тоа ни беше прва договорена поголема инвестиција во регионот на Охрид – Струга“, напиша Груевски.
Година и пол „ОДВ Електрик“ работи во изнајмен објект и веќе вработува над 200 лица.
Во фабриката се производуваат кабли и електрични инсталации за автомобилски брендови како „Порше“, „Мерцедес“, „БМВ“ и „Фолсваген“.
Инвестиција е вредна пет милиони евра во новиот производствен погон во Зоната, на површина од четири и пол илјади метри квадратни. Подоцна се планира негово проширување на површина од девет илјади метри квадратни со целокупна вредност на инвестицијата од 15 милиони евра.