Производствените цени во Јапонија се зголемуваат во август со најбрза стапка на годишна основа по пред речиси девет години, објави Ројтерс. Силна побарувачката во Кина ги охрабрува цените на суровините и дава надеж дека и корисничката инфлација ќе се забрза и ќе ја доближи целта од 2%.
Производствената инфлација во Јапонија се забрзува до 2,9%, а раст во цените има веќе осми месец по ред, покажуваат податоците на централната банка. Во јули вредноста изнесуваше 2,6 отсто.
Сепак, според некои економисти, забрзувањето не е доволно силно за компаниите да ги зголемат цените за малопродажните производи. „Зголемувањето е управувано главно од стоки кои се под влијание на глобалните цени на суровините како нафта и метали“, коментира Тору Суехиро, виш пазарен економист во „Mizuho Securities“.
„Инфлацискиот притисок останува слаб за стоки, како машините“, додава тој и предвиде дека производствената инфлација најверојатно ќе го достигне својот максимум во октомври.
Економијата на Јапонија се прошири за 2,5% годишна стапка на раст во вториот квартал, благодарение на силниот извоз и долгоочекуваното забрзување во приватната потрошувачка. Сепак, основната инфлација на потрошувачите беше само 0,5% на годишна основа во јули, што е далеку под целта од 2%.
Јапонската централна банка мораше да го одложи рокот за постигнување на целта за инфлацијата шест пати откако ја воведе големата програма за стимулации во 2013-та година. Регулаторот се надева дека инфлацијата ќе ја достигне целта до март 2020-та година, бидејќи има сигнали за сила во економијата, додека стабилниот пазар на трудот промовира раст на платите и ја зголемува куповната моќ на домаќинствата.