Утре во 17:30 часот (четврток, 7-ми септември), започнува централната прослава за Денот на независноста на Македонија.
Музичарите кои ќе настапат на прославата, со свои пораки им го честитаа празникот на граѓаните на Република Македонија и ги повикаа заедно да го прослават Денот на независноста.
– Првпат групата Љубојна настапува на еден ваков голем празник, празник кој на сите ни значи, и со радост и со љубов си го носиме во срцето. Музиката одсекогаш била таа која што имала главен акцент во целиот културен мозаик на Македонија. Тоа е нешто кое што најмногу е поврзано со слободата на изразувањето, со човековата слобода – изјави денеска Вера Милошевска од групата Љубојна.
-Со драго срце ја прифатив поканата да бидам дел од овој музички хепенинг. И како би можеле поинаку да го прославиме денот на државноста, ако не со добра музика. Им го честитам денот на државноста на сите граѓани на Република Македонија – рече Бени Шакири од групата Нон-Стоп.
Иконата на македонскиот рок-енд-рол, Влатко Стефановски, кој после долго патување и настапи надвор од Македонија, вели дека е среќен што повторно ќе настапува на денот на независноста, и потсети дека тој исто така настапувал на прогласувањето на независноста во 1991 година.
-Би сакал да ве поздравам, да ви го честитам празникот 8 септември, и мене ми е драго што со еден ваков концерт, голем рок концерт, го одбележуваме празникот. Тоа зборува за едно ново чувство, за еден нов дух кој во моментов е присутен во Македонија – изјави Влатко Стефаноски.
Како што веќе соопштивме, на централната прослава ќе настапат повеќе музички изведувачи: Биг бенд на Здружението на џез музичарите на Македонија, Љубојна со специјалниот гостин Џамбо Агушев, Бени и Нон-стоп со специјален гостин Златко Ориѓански, Влатко Стефановски Трио, К’пурдат од Тетово, Шутка Рома Рап и хип хоп артистот Слаткар.
Секој е добредојден, заедно да го прославиме Денот на независноста.
Агенда:
17:30 часот – Централната прослава за Денот на независноста на Македонија започнува со интерактивна уметничка инсталација – изложба на платото пред Владата и внатре во зградата.
- Фоторепортерите и снимателите може да снимаат инсерти од уметничката инсталација во зградата на Владата на РМ од 17:00 часот до 19:00 со можност да снимате и инсерти од гостите кои ќе ја посетат изложбата (влезот за фоторепортери и сниматели ќе биде отворен од главната врата на Влада на Република Македонија).
18:00 часот – Започнува детската театарска претстава “Маша и нејзината приказна” – работена по популарната серија “Бајките на Маша”. Претставата е од интерактивен карактер, изобилува со музички делови, оригинални костими, а секако присутни се и едукативни моменти.
Граѓаните кои ќе присуствуваат на настаните ќе имаат можност да ги гледаат Dancers United, танцово студио за инклузивни настапи на танчери со Даунов Синдром и танчери со типичен развој.
19:00 часот – Пред Влада на РМ, започнуваат со настап Гудачки квартет ВИВА Стринг, а по нив настапува Хорот при Македонската опера и балет со неколку кратки композиции од Прокопиев, како и изведба на химната на Република Македонија.
19:30 часот – Обраќањето на Претседателот на Влада на РМ.
- Со цел да ви овозможиме непречено работење, медиа центарот на Влада на Република Македонија за новинарите, снимателите и фоторепортерите ќе биде отворен од 17:00 до 21:30 часот, додека влезот за новинари и сниматели е од северната страна на зградата на Влада на РМ.
20:00 часот – На централната прослава ќе настапат и повеќе музички изведувачи: Биг бенд на Здружението на џез музичарите на Македонија, Љубојна со специјалниот гостин Џамбо Агушев, Бени и Нон-стоп со специјален гостин Златко Ориѓански, Влатко Стефановски Трио, К’пурдат од Тетово, Шутка Рома Рап и хип хоп артистот Слаткар.
