Меѓународната агенција за енергетика (ИЕА) и понатака не гледа потреба за меѓународно координирано пуштање на нафтата од залихите на пазарите.
Ураганот Харви поремети голем дел од преработката во САД и „затвори“ некои производни погони, соопшти денес оваа агенција со седиште во Париз.
Агенцијата, која ја координира енергетската политика на индустријализираните земји, наведе дека ја следи ситуацијата во Тексас и Лузијана за да го процени влијанието на ураганот на пазарите за нафта и гас, додавајќи дека тие се добро снабдени, како и дека е во постојан контакт со властите од Соединетите Држави, пренесува агенцијата Ројтерс.
„До денес пазарните механизми и помошта од владата беа адекватни. ИЕА е подготвена да делува по потреба“, се наведува во соопштението.
„Постојат високи нивоа на залихи во погодените региони и Соединетите Држави како целина. Овие залихи се дополнуваат со увозот на бензин на источната обала од Соединетите Држави, а американскиот секретаријат за енргетика презема акција да го ублажи локалниот недостаток на нафта во Тексас така што обезбеди позајмици од сирова нафта од американските стратешки резерви“, порача ИЕА.
