Завршена е првата фаза од реновирањето на објектот на градинката „Сончоглед“ во населбата Кисела Вода. Финализирани се градежните зафати кои опфатија промена на ламинатот на површина од 800 квадратни метри, внатрешно молерисување на објектот, отстранување на старата ламперија и поставување гипс-картон со глетување на ѕидовите.
Како што информираат од Општината, за реализацијата на овие реконструктивни зафати се вложени околу 900.000 денари. До крајот на 2017 година ќе тече и втората фаза, која ќе овозможи санација на тоалетите, а веќе во третата фаза, која е предвидено да се реализира во 2018 година, ќе се изврши реновирање на делот со јаслите, промена на прозорците и ламинатот.
Објектот на градинката „Сончоглед“ згрижува 260 дечиња. Се наоѓа на улицата Локов во населбата Кисела Вода и е дел од ЈДГ „Весели цветови“. Датира од 1975 година.
