Естонија размислува да покрене сопствена виртуелна валута, нешто како „балтички биткоин“.
Доколку планот се реализира, тоа би била првата иницијатива за дигитална валута од некоја влада.
Овој чекор е дел од програмата за Е-резиденција, која Естонија ја покрена на крајот на 2014 година.
Образецот за пријава е краток, таксата е 100 евра и после неколку кликнувања можете да станете дигитален жител на Естонија.
На програмата можат да се пријават луѓе од целиот свет, можат да добијат лична карта, но и да започнат бизнис во таа земја.
Издавањето на национална криптовалута се смета за следен чекор во таа смисла.
„Дигиталната валута која би ја поддржала владата ќе има големо влијание и на иднината на земјата, но ќе помогне и во зајакнувањето на економијата“, вели Каспар Крјус, генералниот директор на програмата Е-резиденција за Естонија.
Првите проценки покажуваат дека Естонија, која сега има 1,3 милиони жители, би можела да добие 10 милиони е-жители.