Грција ги претстави морските области во кои светските енергетски гиганти ќе бараат нафта и гас.
Блоковите се наоѓаат во три региони на Јонското Море и долж островот Крит. Тие ќе бидат дадени под концесија за истражување и експлоатација во тие наоѓалишта.
Одлуките за експлоатацијата се земени од министерот за животна средина и енергетика Јоргос Статакис, а мапите со означените области се објавени во грчкиот Службен весник.
Станува збор за области во Јонското Море северно од островот Кефалонија, западно од островот Лефкада и западно од островот Крф, како и југозападно од островот Крит.
Интересот за овие студии е огромен и доаѓа од компании главно од САД и Франција.
Грција започна амбициозна програма за откривање на нови наоѓалишта на нафта и гас, притисната од долготрајната финансиска криза и охрабрена од неодамнешните откритија на големи гасни полиња во Источниот Медитеран.
Во врска со тоа грчкото Министерство за животна средина и енергетика подготвува нови тендери за доделување на концесија за студии и работа по барање на конзорциумот составен од американската компанија „Exxon Mobil“ и компанијата „Energean Oil & Gaz“.
Француската „Total“ и грчката „Hellenic Petroleum“ исто така изразија интерес да бараат нафта и гас крај островот Крит.
Според некои студии Грција очекува во рок од 30 години приходите од развој на наоѓалишта да надмине 150 милијарди евра.
