Индустриското производство во Германија во мај се зголеми повеќе од прогнозите, со што се зголемуваат очекувањата дека фабриките ќе го помогнат растот на најголемата економија во Европа во текот на вториот квартал. Ова го покажуваат објавените официјални податоци, цитирани од „Ројтерс“.
Изненадувачкиот оптимистички резултат е уште еден „бран“ силни податоци кои веројатно ќе им помогнат на канцеларката Ангела Меркел и нејзините конзервативци да го подобрат имиџот на економската политика пред изборите на 24-ти септември, на кои таа ќе се бори за четврти мандат, забележуваат агенциите.
Во мај во однос на април, индустриското производство се зголемува за 1,2 проценти, објави германското Министерство за економија. Показателот се покачува за петти месец по ред и превзема консензус прогноза на експертите анкетирани од „Ројтерс“ за раст од 0,3 отсто.
Повторното заживување се должи на скокот во производството на енергија и стоки за широка потрошувачка.
Благопријатната слика е пренесена и во помалку променливата квартална проценка – од март до мај индустриското производство се зголемува за 2,1 проценти, а градежништвото забележува раст од 6,1 проценти.
„Сега секторот е на пат да порасне за 2 проценти во вториот квартал – нешто на што не сме биле сведоци од 2010-та година“, коментира економистот Александар Кругер од „Bankhaus Lampe“.
Други податоци објавени вчера, покажуваат дека силната побарувачка од странство дава поттик на налозите за индустријата во Германија во мај, но зголемувањето е под прогнозите.