Директорот на албанската полиција, Хаки Чако, изјави дека клучен приоритет на полицијата по парламантарните избори што се одржаа на 25 јуни е пресметката со производителите на дрогата. Чако за албанската телевизија Топ Чанел рече дека оваа активност мора дефинитивно да заврши.
„Имаме проблеми, како со производителите така и со шверцерите на дрогата од типот марихуана“, нагласи тој.
Меѓународниот фактор врши отворен притисок врз официјална Тирана да се пресмета со производителите на дрога бидејќи земјата е главен производител на марихуана во Европа. Повеќепати претставници на ЕУ, ОБСЕ како и на САД бараа власта во Албанија да се пресмета конечно со производителите на дрогата, а ова стана и еден од главните услови за интеграција на Албанија во ЕУ.
Според албанските медиуми, само во последните три месеци во Албанија, Италија и Грција се запленети повеќе од 20 тони албанска дрога.
